jahan sinon men dil shanon pe sar abad hote hain
vahi do-char to basti men ghar abad hote hain
bahut sabit-qadam niklen ga.e vaqton ki tahziben
ki ab un ke havalon se khanDar abad hote hain
buzurgon ko tabarruk ki tarah rakkho makanon men
bala.en rad kiye jaane se ghar abad hote hain
zaban-bandi ke mausam men gali-kuchon ki mat puchho
parindon ke chahakne se shajar abad hote hain
jo patthar ki silon ko taj-mahalon men badal Dalen
yahan kachche gharon men vo hunar abad hote hain
mire andoh men muzmar hai us ki sarḳhushi aise
Dubo kar kashtiyan jaise bhanvar abad hote hain
miri ta.amir behtar shakl men hone ko hai ‘anjum’
ki jangal saaf hone se nagar abad hote hain
Leave a Reply