Waseem Tashif
ye tum ne paanv kya rakkha hua tha
zamin ne hausla rakkha hua tha
parindon se hamari dosti thi
shajar se vasta rakkha hua tha
tabhi ham ji rahe the ḳhush-dili se
ki tum ne rabta rakkha hua tha
ba-zahir lag rahi thi iinT lekin
saḌak par hadisa rakkha hua tha
kisi ne ghar baḌe rakkhe hue the
kisi ne dil baḌa rakkha hua tha
tiri nisbat se sab kuchh mil raha tha
vagarna mujh men kya rakkha hua tha
hava-e-aḳhir-e-shab ne diyon se
suluk-e-narava rakkha hua tha
Leave a Reply