Bus Ki Ab Zulf Ka Sauda Bhi Mere Sar Mein Nahin

Waqar Manvi

bus ki ab zulf ka sauda bhi mire sar men nahin

kya karun maang ke us ko jo muqaddar men nahin

vo bhi manzar tha ki ḳhud mujh men tha ik ik manzar

ye bhi manzar hai ki ab main kisi manzar men nahin

ab jo ham ḳhud ko sameTen to sameTen kitna

sar bhi hai apna khula paanv bhi chadar men nahin

ai mire shauq-e-shahadat tira hafiz hai ḳhuda

saḳht jaan main bhi huun aur dhaar bhi ḳhanjar men nahin

milne ki aas men kanTon pe bhi chal kar ḳhush tha

aur ab chain mujhe phulon ke bistar men nahin

ab miri pyaas ke bujhne ka nahin koi saval

ab mire naam ki sahba kisi saghar men nahin

baat ye hai ki nazar tab-e-nazar kho baiThi

ye nahin hai ki kashish ab kisi paikar men nahin

main to sab ka huun rifaqat pe miri sab ko hai naaz

koi mera hi magar mere bhare ghar men nahin

pur-tapak aaj bhi milte hain na jaane kitne

lekin iḳhlas ‘vaqar’ in men se aksar men nahin