har shaḳhs ban gaya hai ḳhuda tere shahr men
kis kis ke dar pe mangin dua tere shahr men
mujrim hain saare ahl-e-vafa tere shahr men
kya ḳhuub hai vafa ka sila tere shahr men
ahl-e-havas ke naam se hain ru-shanas ḳhalq
milti hai jin ko dad-e-vafa tere shahr men
rakhte hain log tohmaten apne nasib par
karte hain yuun bhi tera gila tere shahr men
apnon pe e’timad na ghairon pe e’timad
ye kaisi chal paḌi hai hava tere shahr men
hota hai kis maraz ka mudava tire yahan
milti hai kis maraz ki dava tere shahr men
rakhte hain har jaza ko qayamat pe munhasir
dete hain har ḳhata ki saza tere shahr men
Leave a Reply