jugnu ki raushni hai kashana-e-chaman men
ya shama jal rahi hai phulon ki anjuman men
aaya hai asman se ud kar koi sitara
ya jaan pad gai hai mahtab ki kiran men
ya shab ki saltanat men din ka safir aaya
ghurbat men aa ke chamka gumnam tha vatan men
takma koi gira hai mahtab ki qaba ka
zarra hai ya numayan suraj ke pairahan men
husn-e-qadim ki ik poshida ye jhalak thi
le aai jis ko qudrat khalvat se anjuman men
chhote se chand men hai zulmat bhi raushni bhi
nikla kabhi gahan se aaya kabhi gahan men
Leave a Reply