Baja Ye Raunaq-E-Mahfil Magar Kahan Hain Wo Log

bajā ye raunaq-e-mahfil magar kahāñ haiñ vo log

yahāñ jo ahl-e-mohabbat ke jā-nashīñ hoñge

kahāñ se aaj mirī ruuh meñ chamak uTThe

vo tere dukh jo tujhe yaad bhī nahīñ hoñge

zamāna garm-e-safar hai kahīñ to pā.egā

vo dil jo mehr-o-mohabbat kī sarzamīñ hoñge

maiñ kar rahā huuñ tirī chashm-e-nam se andāza

ki aane vaale zamāne bahut hasīñ hoñge

‘salīm’ ghar se nikal kar na jaao sahrā meñ

havā ke raag bahut dard-āfrīñ hoñge

Leave a Comment