tera ye lutf kisi zaḳhm ka unvan na ho
ye jo sahil sa nazar aata hai tufan na ho
kya bala shahar pe TuuTi hai ḳhuda ḳhair kare
yuun sar-e-sham koi dasht bhi viran na ho
rang ḳhushbu se juda ho to bikhar jaata hai
dekhne vaale mire haal pe hairan na ho
baat banti hai to phir aap hi ban jaati hai
itni mayus muqaddar se miri jaan na ho
siikh is shahar men jiine ka saliqa ‘amjad’
koi marta hai mare, aap ka nuqsan na ho
Leave a Reply