dard ki raat ne ye rang bhi dikhlae hain
meri palkon pe sitare se utar aae hain
dil ke virane men kis yaad ka jhonka guzra
kis ne is ret men ye phuul se mahkae hain
ham ne socha tiri ankhen to uthen lab to hilen
is liye ham tiri mahfil se chale aae hain
jin se insan ke zakhmon ka mudava na hua
aaj vo chand sitaron ki khabar laae hain
chand sikkon ki talab hasrat-e-beja to na thi
phir bhi ham phaile hue haath se ghabrae hain
Leave a Reply