Kafeel Aazar Amrohvi
ye hadisa to hua hi nahin hai tere ba.ad
ghazal kisi ko kaha hi nahin hai tere ba.ad
hai pur-sukun samundar kuchh is tarah dil ka
ki jaise chand khila hi nahin hai tere ba.ad
mahakti raat se dil se qalam se kaghaz se
kisi se rabt rakha hi nahin hai tere ba.ad
ḳhayal ḳhvab fasane kahaniyan thiin magar
vo ḳhat tujhe bhi likha hi nahin hai tere ba.ad
kahan se mahkegi honTon pe lams ki ḳhushbu
kisi ko main ne chhua hi nahin hai tere ba.ad
charagh palkon pe ‘azar’ kisi ki yadon ka
qasam ḳhuda ki jala hi nahin hai tere ba.ad
Leave a Reply