ai dost! tiri aankh jo nam hai to mujhe kya
main khuub hansunga tujhe gham hai to mujhe kya
kya main ne kaha tha ki zamane se bhala kar
ab tu bhi sazavar-e-sitam hai to mujhe kya
haan le le qasam gar mujhe qatra bhi mila ho
tu shaki-e-arbab-e-karam hai to mujhe kya
jis dar se nadamat ke siva kuchh nahin milta
us dar pe tira sar bhi jo kham hai to mujhe kya
main ne to pukara hai mohabbat ke ufaq se
raste men tire sang-e-haram hai to mujhe kya
bhula to na hoga tujhe suqrat ka anjam
hathon men tire saghar-e-sam hai to mujhe kya
patthar na paden gar sar-e-bazar to kahna
tu motarif-e-husn-e-sanam hai to mujhe kya
main sarmad o mansur bana huun tiri khatir
ye bhi tiri ummid se kam hai to mujhe kya