gham ki is sil ko kabhi bhi na samajh pa.egi
tu mire dil ko kabhi bhi na samajh pa.egi
mujh ko taslim tiri saari zehanat lekin
mujh se jahil ko kabhi bhi na samajh pa.egi
puchh le mujh se haqiqat tu vagarna apne
aankh ke til ko kabhi bhi na samajh pa.egi
bin mohabbat ke tu hansti hui in ankhon ki
bhigi jhilmil ko kabhi bhi na samajh pa.egi
zindagi ḳhud bhi tujhe marna paḌega varna
mere qatil ko kabhi bhi na samajh pa.egi
Leave a Reply