sab tamanna.en hon puuri koi ḳhvahish bhi rahe
chahta vo hai mohabbat men numa.ish bhi rahe
asman chume mire pankh tiri rahmat se
aur kisi peḌ ki Daali pe riha.ish bhi rahe
us ne saunpa nahin mujh ko mire hisse ka vajud
us ki koshish hai ki mujh se miri ranjish bhi rahe
mujh ko ma.alum hai mera hai vo main us ka huun
us ki chahat hai ki rasmon ki ye bandish bhi rahe
mausamon se rahen ‘vishvas’ ke aise rishte
kuchh adavat bhi rahe thoḌi navazish bhi rahe
Leave a Reply