Raza Amrohvi
ḳhabar un ko na ho kuchh bhi hamen taskin bhi mil jaa.e
saba ai kaash un ki zulf se nik.hat chura laa.e
kisi ko to mile taza-o-tar phulon ke gul-daste
magar ham ne to murjha.e hue gul bhi nahin paa.e
hamin tishna rahe mai-ḳhana-e-hasti men ai saaqi
janab-e-shaiḳh ne masjid men saghar ḳhuub chhalka.e
farozan hai mata-e-arzu jis ke ḳhayalon se
tasavvur men hain us zohra-jabin ke ḳhush-numa saa.e
mohabbat rang laati hi rahi bagh-e-tamanna men
chaman men jis kali ko ham ne dekha aap yaad aa.e
guzar ja.unga duniya se ‘raza’ main be-niyazana
kise malum hai tum tak na aa.e ya ḳhabar aa.e
Leave a Reply