Jab Talak Tir Tera Aawe Hai Nakhchir Talak

jab talak tiir tira aave hai nakhchir talak

le ye nakhchir hi aa pahuncha tire tiir talak

dast-o-pa maare bahut chah-e-zanakh men dil ne

haath lekin na gaya zulf ki zanjir talak

shukr-sad-shukr ki uqde yuun hi hal hote gae

kaam pahuncha na hamara kabhi tadbir talak

us ki surat ka divana huun ki jis ka khat-o-khal

na gaya mani-o-bahzad ki tahrir talak

hai yahi shauq shahadat ka agar dil men to ishq

le hi pahunchega hamen bhi tiri shamshir talak

ik musalman ka ji jaata hai ulfat men tiri

ja kahe koi ye us kafir-e-be-pir talak

jab talak zar hai to sab koi hai phir koi nahin

sach hai makkhi bhi rahe hai shakar-o-shir talak

is tarah baith gaya khana-e-dil mera ki bas

kaam phir us ka na pahuncha kabhi taamir talak

khuun ho ho ke tapakta hai ye sau rang se dil

ta kisi rang men pahunche tiri tasvir talak

main bhi ik maani-e-pechida ajab tha ki ‘hasan’

guftugu meri na pahunchi kabhi taqrir talak

Leave a Comment