Poet
sirf baton se bahal jaane ka qaa.il to nahin
dil mira saada hai ehsas se ghafil to nahin
vaar karta hai nazar se yahi qatil to nahin
choT kha kar jo taḌapta hai mira dil to nahin
shor-o-ghul baḌhta hi jaata hai mire kanon men
dil men jo hai vahi tufan lab-e-sahil to nahin
qafile valon ne bistar jahan apne khole
sach to ye hai vo mire naam ki manzil to nahin
samna ho to pata bhi chale phir kaun hai kya
main ne maana ki koi mire muqabil to nahin
mahfilen aur bhi hain husn-o-ada ki lekin
teri mahfil ki tarah ab koi mahfil to nahin
ham to tayyar hain ik hashr uThane ke liye
aap ḳhud hi kisi tufan se ghafil to nahin
duur hi se nazar aa jaata hai ‘jami’ tera
bhiiḌ men rah ke bhi vo bhiiḌ men shamil to nahin
Leave a Reply