Azhar Naiyyar
har ek raah men imkan-e-hadisa hai abhi
ki kho na ja.un andhere men sochna hai abhi
tamam umr vo chalta raha hai sahra men
ghane daraḳht ke saa.e men jo khaḌa hai abhi
sukun tere tasavvur se jis ko milta hai
vo teri diid ko lekin taḌap raha hai abhi
har ek shaḳhs ke chehre pe ḳhauf taari hai
na jaane kaun andhere men chiḳhta hai abhi
vo kho gaya hai kahin bhiiḌ men to kya kijiye
jo dukh hai us ke na milne ka vo juda hai abhi
Thahar ga.e ho sar-e-rah kis liye aḳhir
chale bhi jaao ki koi bala raha hai abhi
daricha khol ke ‘nayyar’ na dekhiye bahar
lahuluhan manazir ka silsila hai abhi
Leave a Reply