gardish-e-sayyargan ḳhuub hai apni jagah
aur ye apna makan ḳhuub hai apni jagah
ai dil-e-ashufta-sar raat andheri hai par
raqs tira sham.a-san ḳhuub hai apni jagah
kaghaz-e-atish-zada teri hikayat hi kya
phir bhi tamasha-e-jan ḳhuub hai apni jagah
hijr-nazhadon ka hai ek alag hi jahan
us se na milna yahan ḳhuub hai apni jagah
sair-e-bayaban-o-dar uqda-kusha niiz
ranj-e-masafat miyan ḳhuub hai apni jagah
chehra-e-bilqis par aankh Thaharti nahin
sub.h-e-yaman ka saman ḳhuub hai apni jagah
Leave a Reply