log aa.e hi nahin mujh ko mayassar aise
jo mujhe kahte ki aise nahin ‘azbar’ aise
jaisa main huun mire chehre ki hansi jaisi hai
ghaur se dekh ki hote nahin joker aise
tez dauḌa ke achanak miri rassi khinchi
us ne samjhaya mujhe lagti hai Thokar aise
aankh khulne pe jo uThta huun to chakrata huun
kaun deta hai mujhe ḳhvab men chakkar aise
zulf aisi ke siyah reshmi jangal koi
nain us shaḳhs ke hain surma.i marmar aise
koi to hota jo siine se laga kar kahta
baat thi baat ko lete nahin dil par aise
kis ne socha tha ki kamron men faqat chup hogi
kis ne socha tha ki guzrega september aise
haa.e aḳhir men vahi hadisa pesh aaya ‘safir’
hamen kahna paḌa likkhe the muqaddar aise
Leave a Reply