ashk-bari na miti sina-figari na gai
lala-kari kisi surat bhi hamari na gai
kucha-e-husn chhuta to hue rusva-e-sharab
apni qismat men jo likkhi thi vo khvari na gai
un ki mastana nigahon ka nahin koi qusur
naseho zindagi khud ham se sanvari na gai
chashm-e-mahzun pe na lahrai vo zulf-e-shadab
ye pari ham se bhi shishe men utari na gai
muddaten ho gaiin bichhde hue tum se lekin
aaj tak dil se mire yaad tumhari na gai
shaad o khandan rahe ham yuun to jahan men lekin
apni fitrat se kabhi dard-shiari na gai
saikdon baar mire samne ki tauba magar
tauba ‘akhtar’ ki tiri bada-gusari na gai
Leave a Reply