charagh ho gaya bad-nam kuchh ziyada hi
ki jal raha tha sar-e-bam kuchh ziyada hi
tire bhulane men mera qusur itna hai
ki paḌ ga.e the mujhe kaam kuchh ziyada hi
main kitne haath se guzra yahan tak aate hue
mujhe kiya gaya nilam kuchh ziyada hi
malal teri juda.i ka be-panah lekin
fasurda hai ye miri shaam kuchh ziyada hi
tamam umr ki avargi baja lekin
laga hai ishq ka ilzam kuchh ziyada hi
bas ek raat se kaise thakan utarti hai
badan ko chahiye aram kuchh ziyada hi
sambhal apni bahakti hui zaban ‘mansur’
tu le raha hai koi naam kuchh ziyada hi
Leave a Reply