Munshi Naubat Rai Nazar Lakhnavi
karobar-e-ishq ki kasrat kabhi aisi na thi
dil na tha to tangi-e-fursat kabhi aisi na thi
yaas se virani-e-hasrat kabhi aisi na thi
dil men sannata na tha vahshat kabhi aisi na thi
un ke vaade par hamen jiina pada hai hashr tak
varna tulani shab-e-furqat kabhi aisi na thi
dekh daale zindagi men vasl-o-furqat ke tilism
gham kabhi aisa na tha rahat kabhi aisi na thi
aap ne bimar-pursi ki to jiina hai vabal
varna marne ki mujhe hasrat kabhi aisi na thi
ba-maza hai kis qadar inkar un ka vasl men
tujh men ai khun-e-jigar lazzat kabhi aisi na thi
dil ko kya samjha diya naumidi-e-javed ne
parda-dar-e-gham shab-e-furqat kabhi aisi na thi
zindagi ki kashmakash se mar ke paai kuchh najat
is se pahle ai ‘nazar’ fursat kabhi aisi na thi
Leave a Reply