Sadique Naseem
is ehtimam se parvane peshtar na jale
tavaf-e-sham.a karen aur kisi ke par na jale
hava hi aisi chali hai har ek sochta hai
tamam shahr jale ek mera ghar na jale
hamen ye dukh ki numud-e-sahar na dekh sake
sahar ko ham se shikayat ki ta-sahar na jale
charagh-e-shahr nahin ham charagh-e-sahra hain
kise ḳhabar ki jale aur kise ḳhabar na jale
tiri dalil baja par ye kaise maana jaa.e
shajar ko aag lage aur koi samar na jale
shu.ur-e-qurb ki ye bhi hai ik ajab manzil
ham us ko ghair ki mahfil men dekh kar na jale
ye shaam marg-e-tamanna ki shaam hai ‘sadiq’
koi charagh kisi taq-e-chashm par na jale
Leave a Reply