Jis Ke dil Mein Koi Arman Nahin Hota Hai

jis ke dil men koi arman nahin hota hai

meri nazron men vo insan nahin hota hai

ḳhud-kushi jurm samajhte hain zamane vaale

jaan dena koi asan nahin hota hai

har ghaḌi dil men raha karta hai yadon ka hujum

ye vo ghar hai kabhi viran nahin hota hai

bhuli-bisri hui yaden bhi rula deti hain

be-sabab koi pareshan nahin hota hai

vahshat-e-dil ka taqaza hai ki bas pyaar karo

pyaar ke saude men nuqsan nahin hota hai

umr-bhar ke liye aa jaao mire dil men raho

apne ghar men koi mehman nahin hota hai

husn-e-aḳhlaq se man-bap ki ḳhidmat karna

farz to hota hai ehsan nahin hota hai

Leave a Comment