ham apni manzilon ka aap hi naqsha banate hain
chaTanen kaaT kar apne liye rasta banate hain
riya-kari hamare samne kya sar uTha.egi
jo sach ko sach bata.e ham vo a.ina banate hain
alag naqsha banata hai udhar ik asman vaala
zamin vaale zamin par jab koi naqsha banate hain
na ho divar ki bandish na sarhad ki lakiren hon
ham apni kavishon se aisi hi duniya banate hain
rukavaT ko rukavaT kab samajhte hain ham ahl-e-dil
hamare vaste halat ḳhud rasta banate hain
usi ik baat par nalan hain ham se log basti ke
jinhen kahte hain ham apna unhen apna banate hain
ham aise peḌ hain ‘najmi’ jhulaste reg-zaron men
jo tapti dhuup sah kar bhi ghana saaya banate hain
Leave a Reply