Haalat-E-Bimar-E-Gham Par Jis Ko Hairani Nahin

halat-e-bimar-e-gham par jis ko hairani nahin

asal men us aadmi men ḳhu-e-insani nahin

aisi bedardi se us ko mat bahao ḳhaak par

ḳhun-e-insan ḳhun-e-insan hai koi paani nahin

ruuh ka rishta kabhi kya toḌ paa.i hai qaza

zindagi faani hai lekin ruuh to faani nahin

jis ki ḳhushbu se mo.attar raat bhar rahta tha main

mere ghar ke paas ab vo raat ki raani nahin

main ta.ajjub men huun ye kaisa zamana aa gaya

chand men ThanDak nahin suraj men tabani nahin

phir tire uupar na TuuTe kyuun azabon ka pahaḌ

tere andar ik zara bhi bu-e-imani nahin

yuun na apne chahne vaale ko rusva kijiye

ye to andaz-e-suluk-e-dilbar-e-jani nahin

kyuun nahin tufan ka manzar teri chashm-e-shauq men

kyuun tire dariya-e-dil men ab vo tughyani nahin

mutma.in hai ishq bhi sham-e-alam ke bavajud

husn ke chehre pe bhi aks-e-pareshani nahin

ishq men bhi tu na pa.ega kahin mera javab

jan-e-man jo husn men koi tira saani nahin

ai ‘zafar’ paale hue hain vo bhi duniya ki havas

ab faqir-e-ishq men bhi bu-e-irfani nahin