aadmi na itna bhi duur ho zamane se
subh ko juda samjhe shaam ke fasane se
dekh tiflak-e-nadan qadr kar buzurgon ki
gutthiyan na suljhengi mazhaka udane se
zakhm-e-sar ke divane zakhm-e-dil ka qaail ho
zindagi sanvarti hai dil pe chot khane se
mutrib-e-junun-saman tu na chhed ye naghma
dhun kharab hoti hai tere gungunane se
garmi-e-sukhan se kuchh kaam ban nahin sakta
mil hi jaegi manzil do-qadam badhane se
Leave a Reply