ye umar-e-hijr agar sarf-e-intizar na ho
to vaqa.i mujhe hasti pe e’tibar na ho
mujhe nahin hai agar in pe iḳhtiyar na ho
unhen bhi ye dil-e-betab sazgar na ho
vahan vo ḳhush ki mujhe un se kuchh gila hi nahin
yahan ye paas kahin raaz ashkar na ho
raha-saha bhi dil-e-zar ka qarar gaya
vo bar-bar ye kahte hain be-qarar na ho
har ek daman-e-gul par falak ke aansu hain
ḳhizan ki maut se yuun zinat-e-bahar na ho
jafa hui na vafa ab vo sikhte hain haya
ḳhuda kare ye irada bhi ustuvar na ho
na gaa.en ishq ke naghme jo bulbulen ‘talib’
chaman men gul na khilen mausam-e-bahar na ho
Leave a Reply