Poet
ik ajab kaifiyat-e-hosh-ruba taari thi
qarya-e-jan men kisi jashn ki tayyari thi
sar jhuka.e hue maqtal men khaḌe the jallad
taḳhta-e-dar pe laTki hui ḳhuddari thi
ḳhuun hi ḳhuun tha darbar ki divaron par
qabiz-e-taḳht-e-virasat ki riya-kari thi
ek saa.at jo tiri zulf ke saa.e men kaTi
hijr bar-dosh zamanon se kahin bhari thi
aur sab Thiik tha bas ham se bhula.i na ga.i
tere ḳhamosh ravayye men jo be-zari thi
ik qayamat thi ki rusva sar-e-bazar the ham
aur phir us ki vo tashvish bhi bazari thi
tere mahkum tire hashiya-bar-daron ki
sirf vardi hi nahin soch bhi sarkari thi
Leave a Reply