ham din ke payami hain magar kushta-e-shab hain
is haal men bhi raunaq-e-alam ka sabab hain
zahir men ham insan hain mitti ke khilaune
batin men magar tund anasir ka ghazab hain
hain halqa-e-zanjir ka ham khanda-e-javed
zindan men basae hue ik shahr-e-tarab hain
chatki hui ye husn-e-gurezan ki kali hai
ya shiddat-e-jazbat se khulte hue lab hain
aghosh men mahkoge dikhai nahin doge
tum nikhat-e-gulzar ho ham parda-e-shab hain