gham-e-jahan se main ukta gaya to kya hoga
ḳhud apni fikr men ghulne laga to kya hoga
ye na-guzir hai ummid ki numu ke liye
guzarta vaqt kahin tham gaya to kya hoga
yahi bahut hai ki ham ko sukun se jiine de
kisi ke hathon hamara bhala to kya hoga
ye log meri ḳhamoshi pe mujh se nalan hain
koi ye puchhe main goya hua to kya hoga
main is liye bhi bahut muḳhtalif huun logon se
vo sochte hain ki aisa hua to kya hoga
junun ki raah ajab hai ki paanv dharne ko
zamin tak bhi nahin naqsh-e-pa to kya hoga
ye ek ḳhauf bhi meri ḳhushi men shamil hai
tira bhi dhyan agar haT gaya to kya hoga
jo ho raha hai vo hota chala gaya to phir?
jo hone ko hai vahi ho gaya to kya hoga
Leave a Reply