Sabeela Inam Siddiqui
idrak hi muhal hai ḳhvab-o-ḳhayal ka
dil ke varaq pe aks hai us ke jamal ka
roti nahin huun main kabhi duniya ke samne
rakhti huun hausla main nihayat kamal ka
hain marhale ajiib ye ishq-o-ḳhirad ke bhi
lamhon men kar rahi huun safar mah-o-sal ka
darvesh hai koi to qalandar vali koi
bandon ne paaya ishq men rutba kamal ka
itne sukun se main ne kiya ishq ka safar
aaya nahin guman kisi ehtimal ka
kaisa ajiib daur hai maujuda daur bhi
mafhum koi samjhe na dil ke saval ka
dam ghuT raha ho jab mira apne vajud men
kya ḳhaak tazkira ho firaq-o-visal ka
karti nahin ‘sabila’ gila main ye soch kar
sathi nahin yahan koi ranj-o-malal ka
Leave a Reply