Urooj Qadri
tasavvurat ki duniya basa raha huun main
tire ḳhayal se taskin pa raha huun main
ḳhayal-o-vahm se unchi bahut hai teri zaat
tiri sifat ka naqsha jama raha huun main
mira vajud bhi partav hai teri hasti ka
dil-e-hazin men tira nuur pa raha huun main
ye kaun hai ki ma.ayyat ka lutf hasil hai
tamam alam-e-imkan pe chha raha huun main
tire karam ki nihayat nahin mire malik
ki musht-e-ḳhak ko kundan bana raha huun main
jilau men jis ki ho amn-o-sukun ki gul-pashi
vo inqalab zamane men la raha huun main
tire kalam-e-muqaddas se raushni le kar
andheri raat men sham.en jala raha huun main
miri bisat hi kya hai jahan ke rakhvale
tire sahare pe himmat dikha raha huun main
Leave a Reply