Farhat Ehsas
aḳhir us ke husn ki mushkil ko hal main ne kiya
ek nasri nazm thi jis ko ghazal main ne kiya
kya balaghat aa ga.i us ke badan ke matn men
chand lafzon ka jo kuchh radd-o-badal main ne kiya
ba.is-e-tauhin hai dil ke liye takrar-e-jism
aaj phir kaise karun vo sab jo kal main ne kiya
bazm ho bazar ho saari nigahen mujh pe hain
kya un ankhon ke isharon par amal main ne kiya
jis jagah marna tha mujh ko main vahan jiita raha
ishq men har kaam be-mauqa-mahal main ne kiya
Leave a Reply