Jab Purab Mein Nil Ambar Par Ek Kafuri Phul Khila

jab pūrab meñ niil ambar par ik kafūrī phuul khilā

raat guzarne ke ġham meñ tāroñ ne hiirā chaaT liyā

lok parlok pe phail rahī hai yādoñ kī chanchal ḳhushbū

dhyān ke Thahre sāgar meñ kis ne phir kañkar pheñk diyā

us ke narm madhur boloñ ne dil par chhāvnī chhā.ī thī

yā taptī sūkhī dhartī par chhājoñ hī meñh barsā thā

jal vahī hai amrit jal jis se janm janm kī pyaas bujhe

chāhe vo pachchhim kā ‘thames’ ho chāhe vo pūrab kī gañgā

kyā jaane kyā baat thī lekin ham jab pahlī baar mile

vo bhī khaḌī rahī gum-sum sī aur maiñ bhī chup chaap rahā

jab bhī ‘tūr’ use DhūñDne ko gahre banoñ meñ jaatā huuñ

ik āvāz ye kahtī hai mujh se mūrakh ghar ko vāpas jā

Leave a Comment