Amjad Husain Hafiz Karnataki
ye raaz koi janne vaala bhi nahin hai
suraj ki virasat men ujala bhi nahin hai
sau raste kamane ke nazar aate hain lekin
khane ke liye ek nivala bhi nahin hai
lab naam tira lene se katrane lage hain
halanki tujhe dil se nikala bhi nahin hai
kyon surḳh hua hai ye falak aaj sar-e-sham
main ne to lahu apna uchhala bhi nahin hai
vo lafz huun main jo na ada ho saka ‘hafiz’
vo baat huun main jis ka havala bhi nahin hai
Leave a Reply