chalo farar-e-khudi ka koi sila to mila
hamin mile nahin us ko hamen khuda to mila
nashat-e-qarya-e-jan se juda hui khushbu
safar kuchh aisa hai ab ke koi mila to mila
hamare baad rivayat chali mohabbat ki
nizam-e-alam-e-hasti ko falsafa to mila
jo chhod aae the taskin-e-dil ke vaste ham
tumhen ai jan-e-tamanna vo naqsh-e-pa to mila
saval aa gae ankhon se chhin ke honton par
hamen javab na dene ka faeda to mila
ye ah-o-girya-o-zari kahin to kaam aai
hava-e-dasht ko paani ka zaiqa to mila
namaz-e-asr nahin padh saki miri vahshat
junun-e-ishq ko maidan-e-karbala to mila
phir is ke baad baramad na ho saka kuchh bhi
hamare aankh men jalta hua diya to mila
Leave a Reply