Rahat Hasan
jab us ko soch ke dekha to ye kamal hua
miri lughat ka har ik lafz be-misal hua
vo shahr-e-ḳhvab se guzra to daf.atan mujh ko
haqiqaton ke badalne ka ehtimal hua
numud-e-zat ko pahle hi raushni kam thi
baḌhe jo saa.e to kuchh aur bhi malal hua
thama na girne sambhalne ka silsila yuun hi
main apni ḳhaak se uTTha to la-zaval hua
ye mo.ajiza hi bahut hai ki paikar-e-fan ke
jo koi rabt men aaya vo ham-ḳhayal hua
ham apni sada-mizaji men sab se puchhte hain
hamare jaisa bhi aḳhir kisi ka haal hua
hamin the us ke javabon ke muntazir ‘rahat’
so baar baar hamin se koi saval hua
Leave a Reply