Irfan Sattar
koi naghma banun chandni ne kaha chandni ke liye ek taaza ghazal
koi taaza ghazal phir kisi ne kaha phir kisi ke liye ek taaza ghazal
zaḳhm-e-furqat ko palkon se siite hue saans lene ki aadat men jiite hue
ab bhi zinda ho tum zindagi ne kaha zindagi ke liye ek taaza ghazal
us ki ḳhvahish pe tum ko bharosa bhi hai us ke hone na hone ka jhagḌa bhi hai
lutf aaya tumhen gumrahi ne kaha gumrahi ke liye ek taaza ghazal
aisi duniya men kab tak guzara karen tum hi kah do ki kaise gavara karen
raat mujh se miri bebasi ne kaha bebasi ke liye ek taaza ghazal
manzaron se bahalna zaruri nahin ghar se bahar nikalna zaruri nahin
dil ko raushan karo raushni ne kaha raushni ke liye ek taaza ghazal
main ibadat bhi huun main mohabbat bhi huun zindagi ki numu ki alamat bhi huun
meri palkon pe Thahri nami ne kaha is nami ke liye ek taaza ghazal
arzuon ki maala pirone se hain ye zamin asman mere hone se hain
mujh pe bhi kuchh kaho aadmi ne kaha aadmi ke liye ek taaza ghazal
apni tanha.i men raat main tha magan ek aahaT hui dhyan men daf.atan
mujh se baten karo ḳhamushi ne kaha ḳhamushi ke liye ek taaza ghazal
jab rifaqat ka saman baham kar liya main ne aḳhir use ham-qadam kar liya
ab mire dukh saho ham-rahi ne kaha ham-rahi ke liye ek taaza ghazal
Leave a Reply