Shahzad Anjum Burhani
sulagti niind ke girdab se nikal aaya
main aaj ya.ani kisi ḳhvab se nikal aaya
vahan bhi koi nahin tha ḳharab halon ka
main ho ke mimbar-o-mehrab se nikal aaya
ata-e-shan-e-karimi ajiib hoti hai
kinara ḳhud hi tah-e-ab se nikal aaya
hazar sadiyon pe bhari tha ek lamha-e-lams
vo raat jab had-e-adab se nikal aaya
vo dekh maut ke sahil ki ret chamki hai
main zindagi tire sailab se nikal aaya
jise misal men sunte rahe hain ham ‘anjum’
vo par bhi bazu-e-surḳhab se nikal aaya
Leave a Reply