main vo shajar tha
ki mere saae men baithne aur shakhon pe jhulne ki hazaron jismon ko aarzu thi
zamin ki ankhen darazi-e-umar ki duaon men ro rahi thiin
aur suraj ke haath thakte nahin the mujh ko sanvarne men
ki main ik avaz ka safar tha
ajab shajar tha
ki us musafir ka muntazir tha
jo mere saae men aa ke baithe to phir na utthe
jo meri shakhon pe aae jhule to saare mausam yahin guzare
magar vo pagal hava ka jhonka magar vo pagal hava ka jhonka
ajab musafir tha rahguzar ka
jo chhod aaya tha kitni shakhen
magar laga yuun ki jaise ab vo shikasta-tar hai
vo mere khvabon ka ham-safar hai
so main ne saae bichha diye the
tamam jhule hila diye the
magar vo pagal hava ka jhonka magar vo pagal hava ka jhonka
ajab musafir tha rahguzar tha
ki lamhe bhar men guzar chuka tha
main be-numu aur be-samar tha
magar main avaz ka safar tha
so meri avaz ka ajar tha
ajab shajar tha
ajab shajar huun
ki aane vaale sah kah raha huun
ai mere dil men utarne vaale
ai mujh ko shadab karne vaale
tujhe miri raushni mubarak
tujhe miri zindagi mubarak
Leave a Reply