dard-e-musalsal se aahon men paida vo tasir hui
aksar charagaron ki halat mujh se siva gambhir hui
kya jaane kyuun mujh se meri bargashta taqdir hui
mamlikat-e-aish aankh jhapakte hi gham ki jagir hui
us ne mere shisha-e-dil ko dekh ke kyuun munh moḌ liya
shayad is aine men us ko zahir koi lakir hui
jab bhi likkha hal-e-dil-e-muztar main ne us ko raat gae
ta-ba-sahar ashk-afshani se zaae.a vo tahrir hui
baḌhti jaati hai duri-e-manzil jab se junun ne chhoḌa saath
ab to ḳhirad har gaam par apne pairon ki zanjir hui
mujh ko ata karte vo yaqinan meri talab se siva lekin
ḳhuddari men haath na phaila sharm jo daman-gir hui
kis ko ḳhabar hai un ki gali men kitne dilon ka ḳhuun hua
ra.anai men un ki gali jab vadi-e-kashmir hui
un se karun iz.har-e-tamanna socha rakh kar uzr-e-junun
lekin vo bhi raas na aaya la-hasil tadbir hui
Tap-Tap aankh se aansu Tapke ‘ajiz’ ah-e-sard ke saath
mere samne nazr-e-atish jab meri tasvir hui
Leave a Reply