Jameel Malik
munh-band hasraton ko suḳhan-ashna karo
toḌo sukut saz-e-ghazal ibtida karo
laao kahin se sang-e-malamat hi kyuun na ho
yaaro shikast-e-shisha-e-dil ki dua karo
ma.asum laghzishon ki bahut daad mil chuki
ab ashna-e-ghair ke ta.ane suna karo
haare hue ḳhulus pe sharmindagi hai kyuun
kis ne nahin kaha tha ki dil ka kiya karo
nadan ho jahan ka chalan dekhte nahin
rasm-e-jafa ko aam ba-nam-e-vafa karo
phir koi jan-navaz bahana tarash lo
phir koi dil-fareb achhuti ḳhata karo
mil ja.ega ‘jamil’ koi zaḳhm koi phuul
aao na tum bhi kucha-e-dil men sada karo
Leave a Reply