shikast-e-rang-e-tamanna ko arz-e-hal kahun
sukut-e-lab ko taqaza-e-sad-saval kahun
hazar ruḳh tire milne ke hain na milne men
kise firaq kahun aur kise visal kahun
mujhe yaqin hai ki kuchh bhi chhupa nahin un se
unhen ye zid ki dil-e-mubtala ka haal kahun
tu be-misal sahi phir bhi dil ko hai israr
ada ada ko tiri alam-e-misal kahun
mizaj-e-mahfil-e-giti agar na barham ho
to rang-e-aish ko gard-e-ruḳh-e-malal kahun
hava ke dosh pe hai ek shola-e-larzan
kahun to kya tiri tahzib ka ma.aal kahun
vo ek ḳhvab jo tamir aap hai apni
main kya haqiqat-e-rana.i-e-ḳhayal kahun
ghazal ki baat rahegi vahin agar sau baar
javab-e-shoḳhi o rana.i-e-ghazal kahun
‘ravish’ ye sadgi-e-ishq ka taqaza hai
kamal-e-hosh ko iḳhlas ka zaval kahun
Leave a Reply