Hosh Tirmizi
pas-e-namus-e-tamanna har ik azar men tha
nashsha-e-nig.hat-e-gul bhi ḳhalish-e-ḳhar men tha
kis se kahiye ki zamane ko garan guzra hai
vo fasana ki miri hasrat-e-guftar men tha
dil ki aata hi nahin tark-e-tamanna ki taraf
koi iqrar ka pahlu tire inkar men tha
kuchh tujhe yaad hai ai chashm-e-zuleḳha-e-jahan
ham sa yusuf bhi koi misr ke bazar men tha
zindagi ja na saki sham-o-sahar se aage
saara aalam isi a.ina-e-takrar men tha
umr bhar chashm-e-tamasha ko rahi jis ki talash
‘hosh’ vo husn-e-gurezan mire ash.ar men tha
Leave a Reply