Zaheer Kashmiri
ab ishq se lau laga.enge ham
ab dil ke bhi kaam a.enge ham
jab jhuTpuTa hoga sham-e-gham ka
palkon pe diye jala.enge ham
ham ban ga.e hain ada tumhari
chheḌoge to ruuTh ja.enge ham
ai munis-e-dil ai hijr ki raat
le chal diye ab na a.enge ham
kya baiThe-biTha.e ho gaya hai
puchhenge to kya bata.enge ham
vo aankh baḌi jahan-numa hai
us aankh se kya chhupa.enge ham
sahra to ‘zahir’ tang nikla
ab dekhen kidhar ko ja.enge ham
Leave a Reply