Poet
andhi men bisat ulaT ga.i hai
ghanghor ghaTa bhi chhaT ga.i hai
vo gard uḌaa.i hai dukhon ne
divar-e-hayat aT ga.i hai
ḳhanjar ki tarah thi reg-e-sahra
ḳheme ki tanab kaT ga.i hai
miras-e-gulab thi jo ḳhushbu
jhonkon men hava ke baT ga.i hai
pyason ka hujum rah gaya hai
ik tiir se mushk phaT ga.i hai
ik aur bhi din guzar gaya hai
mi.ad-e-azab ghaT ga.i hai
sahil ki baḌha ke tishnagi mauj
dariya ki taraf palaT ga.i hai
phailaunga paanv kya main ‘gulzar’
chadar hi miri simaT ga.i hai
Leave a Reply