khada tha kab se zamin piith par uthae hue
aab aadmi hai qayamat se lau lagae hue
ye dasht se umad aaya hai kis ka sail-e-junun
ki husn-e-shahr khada hai naqab uthae hue
ye bhed tere siva ai khuda kise malum
azaab tuut pade mujh pe kis ke laae hue
ye sail-e-ab na tha zalzala tha paani ka
bikhar bikhar gae qarye mire basae hue
ajab tazad men kaata hai zindagi ka safar
labon pe pyaas thi badal the sar pe chhae hue
sahar hui to koi apne ghar men ruk na saka
kisi ko yaad na aae diye jalae hue
khuda ki shaan ki munkir hain adamiyyat ke
khud apni sukdi hui zaat ke satae hue
jo astin chadhaen bhi muskuraen bhi
vo log hain mire barson ke azmae hue
ye inqilab to taamir ke mizaj men hai
girae jaate hain aivan bane-banae hue
ye aur baat mire bas men thi na guunj is ki
mujhe to muddaten guzrin ye giit gaae hue
miri hi god men kyuun kat ke gir pade hain ‘nadim’
abhi dua ke liye the jo haath uthae hue
Leave a Reply