Akbar Allahabadi
ankhen mujhe talvon se vo malne nahin dete
arman mire dil ke nikalne nahin dete
khatir se tiri yaad ko talne nahin dete
sach hai ki hamin dil ko sambhalne nahin dete
kis naaz se kahte hain vo jhunjhla ke shab-e-vasl
tum to hamen karvat bhi badalne nahin dete
parvanon ne fanus ko dekha to ye bole
kyuun ham ko jalate ho ki jalne nahin dete
hairan huun kis tarah karun arz-e-tamanna
dushman ko to pahlu se vo talne nahin dete
dil vo hai ki fariyad se labrez hai har vaqt
ham vo hain ki kuchh munh se nikalne nahin dete
garmi-e-mohabbat men vo hain aah se manea
pankha nafas-e-sard ka jhalne nahin dete
Leave a Reply