Raat Ka Husn Bhala Kab Wo Samajhta Hoga

raat kā husn bhalā kab vo samajhtā hogā

chāñd be-faiz añdheroñ meñ nikaltā hogā

chand lamhoñ kī rifāqat kā asar hai shāyad

dard mīThā sā kahīñ aur bhī uThtā hogā

hichkiyoñ se yahī andāza lagāyā ham ne

yaad koī to dil-o-jān se kartā hogā

saath guzre hue mausam kā tasavvur le kar

bārishoñ meñ vo har ek saal bahaktā hogā

bas yahī soch ke har roz likhā kartā huuñ

vo mirā ġham mire ash.ār meñ paḌhtā hogā

us ke ashkoñ kā gunāhgār maiñ ho jā.ūñgā

vo mujhe yaad agar kar ke sisaktā hogā

yaad hoñgī use bhūlī huī qasmeñ ‘zākir’

vo mire zikr pe chup-chāp Thahartā hogā

Leave a Comment