Himayat Ali Shayar
kya kya na zindagi ke fasane raqam hue
lekin jo hasil-e-gham-e-dil the vo kam hue
ai tishnagi-e-dard koi gham koi karam
muddat guzar ga.i hai in ankhon ko nam hue
milne ko ek izn-e-tabassum to mil gaya
kuchh dil hi janta hai jo dil par sitam hue
daman ka chaak chak-e-jigar se na mil saka
kitni hi baar dast-o-gareban baham hue
kis ko hai ye ḳhabar ki ba-unvan-e-zindagi
kis husn-e-ehtimam se maslub ham hue
arbab-e-ishq-o-ahl-e-havas men hai farq kya
sab hi tiri nigah men jab mohtaram hue
‘sha.ir’ tumhin pe tang nahin arsa-e-hayat
har ahl-e-fan pe dahr men aise karam hue
Leave a Reply